Quality

ဘောလုံးပွဲတွေ ဆက်နေတာနဲ့ပဲ ဘောလုံးပွဲ ပိုစ့်တွေပဲ အရေးများ၊ အတင်များနေခဲ့၏။ ရေးရတာလည်း လွယ်နေတာကိုး။ မနေ့က ဘယ်လို ပြီးသွားတယ်၊ နက်ဖြန်ပွဲတွေက ဘယ်အချိန် ကန်မယ် အစရှိသဖြင့်ပေါ့။ ကိုယ်သိသလောက် ဘယ်အသင်းက ဘယ်လို အခြေအနေ ရှိတယ် အစ ရှိသဖြင့်ပေါ့။ ဒီလိုတွေ ရေးရေးနေလို့ ကျနော့်ကို Agent တို့ Bookie တို့ ထင်နေကြဦးမည်။ တကယ်က ဒီအသက်အရွယ်အထိ ဘောလုံးပွဲ တပွဲမှ မလောင်းဖူးပေ။ လောင်းကြေးဒိုင်တွေ နားမှ မဟုတ် အချင်းချင်း အပျော်လောင်းတာမျိုးတောင် မလုပ်ဖူးပေ။ ဒီအတိုင်း အလောင်းအစား မပါဘဲ အားပေးရုံ သက်သက်သာ။

တခြား အကြောင်းအရာ စိတ်ကူးမိ၊ တွေးမိ ထားတာမျိုး မရှိတဲ့အခါ ဒါမှမဟုတ် တွေးမိထား ပေမယ့် မရေးချင်သေးသည့်အခါမျိုးတွေမှာ ဘောလုံးအကြောင်းတွေပဲ ကျနော် အလွယ်ရေးလိုက်၏။ ဘောလုံးပွဲတွေက တပတ်လုံး ပြတ်မှ မပြတ်ဘဲကိုး။ အကြောင်းအရာ တခုခုကို ရေးချင်စိတ် ဖြစ်လာတဲ့အခါမျိုးမှာတော့ ဘောလုံးအကြောင်းကို နောက်ဆုတ်ထား လိုက်လေ့ ရှိ၏။ ကိုယ်တွေ United ကလည်း ပြောချင်စရာ ရေးချင်စရာမှ မကောင်းနေဘဲကိုး။

တနေ့ တပိုစ့်ထုံး နှလုံးမူလာခဲ့တာ တခါတလေ တရက်တလေ ပျက်ကွက်တာက လွဲလို့ မှန်မှန်တော့ ရေးဖြစ် တင်ဖြစ်နေသည် ပြောလို့ရ၏။ ခုထိတော့ ဖတ်ရှုသူတွေကို မှတ်သားစရာ ဗဟုသုတ ဖြစ်စရာ ရသ တခုခု ပေးစွမ်းနိုင်သည့် စာမျိုးတွေ မရေး ဖြစ်သေးပေ။ အေးလေ တနေ့ တပိုစ့် ဆိုမှတော့ အ‌ရည်အသွေးထက် အရေအတွက် အသားပေးနေမှတော့ Quality Content, Blog တွေ ရေးနိုင်ဖို့က ခဲယဉ်း ပေလိမ့်မည်။

လက်ရှိမှာ vote ကောင်းကောင်း များများရဖို့ ရည်ရွယ်ပေမယ့် နောက်ပိုင်းမှာတော့ ဒါတွေကို မမျှော်ရသည့် အချိန်တော့ ရောက်လာမှာပါလေ။ ကိုယ့်မှာ power တွေ အများကြီး ရှိလာတဲ့အခါမျိုးမှာပေါ့။ အကောင်းဆုံးသာ ကြိုးစား ရေးနေပါက တနေ့တော့ ဖြစ်လာမှာ မလွဲပေ။ ပိုစ့် ကောင်းကောင်း မရေး ဖြစ်ပေမယ့် ပိုစ့် မှန်မှန်ရေးဖြစ် တင်ဖြစ်နေတာကလည်း အမြတ်ပဲ မလား။

Hive Blockchain မှာ မြန်မာကလူတွေ အနည်းငယ်သာ ကျန်ရှိတော့သည် မဟုတ်လား။ ဒီလူတွေ ဆက်ရေးနေကြသေးလို့သာ။ အချင်းချင်း voting လေး အပြန်အလှန် ပေးကြရင်း Myanmar Community လေး ဆက်လက် ခရီးဆက်နေတာကပဲ ဝမ်းသာ ကျေနပ်စရာပင်။ တချိန်က လူများ ခဲ့ပေမယ့် ခုတော့ နည်းနေတာ ကြာခဲ့ပြီ။ တချိန်မှာတော့ စည်စည်ကားကား ပြန်ဖြစ် လာပါလိမ့်မည်။ တချို့အရာတွေက အချိန်တော့ ပေးရသည် မဟုတ်ပါလား။